Tuesday, September 19, 2017
The largest circulation Armenian online e-magazine on the Internet
Archive
 
 
 
 
 
 
 

 

 

 

 

 

 

 

 

 

 

 

 

 

 

 

 

 

 

Hotels Combined .com

 

Subscribe to Gibrahayer e-magazine by clicking here
Latest issues of Gibrahayer e-magazine here

CLICK ON BUTTON TO DONATE TO GIBRAHAYER

 

 

 

 

 
 

Կիպրահայեր» ելեկտրոնային Կայքէջը
Մրցանակի Արժանացած

www.artsakank.com.cy - Ստեփամակերտի մէջ Հոկտեմբեր 12-16 տեղի ունեցած մամուլի համահայկական խորհրդաժողովին, յայտարարուած են «Լաւագոյն հայկական լրատուամիջոց» մրցանքի արդիւնքները։ Ինտերնետային լրատուամիջոց անուանակարգին տակ մրցանակի արժանացած է նաեւ Կիպրոսի «Կիպրահայեր»ը։ Կը ներկայացնենք պաշտօնական հաղորդագրութիւնը, ինչպէս նաեւ «Կիպրահայեր» կայքէջի պարասխանատու-խմբագիր ընկ. Սիմոն Այնէճեանի ելոյթը.

GIBRAHAYER e-magazine

Ստեփանակերտի մէջ կայացաւ համահայկական «Լաւագոյն հայկական լրատուամիջոց» մրցանակաբաշխութիւնը

www.artsakank.com.cy - Հոկտեմբեր 15-ին Ստեփանակերտի մէջ հայ լրագրողներու 5-րդ համաժողովի փակման հանդիսութեան ընթացքին կայացաւ ՀՀ սփիւռքի նախարարութեան ¨ Համաշխարհային հայկական կոնգրեսի կազմակերպած «Հայապահպանութեան գործում ունեցած նշանակալի աւանդի համար» համահայկական ամենամեայ մրցանակաբաշխութիւնը «Լաւագոյն հայկական լրատուամիջոց» անուանակարգին մէջ:

Մրցանակաբաշխութեան հանդիսաւոր արարողութեան ներկայ էին ՀՀ սփիւռքի նախարար Հրանոյշ Հակոբեանը, Համաշխարհային հայկական կոնգրեսի (ՀՀԿ) նախագահ Արա Աբրահամեանը, ՀՀԿ նախագահի առաջին տեղակալ Արամ Աբրահամեանը, Հայ լրագրողներու 5-րդ համաժողովի մասնակիցները եւ հիւրեր:

«Լաւագոյն հայկական լրատուամիջոց» անուանակարգի տպագիր լրատուամիջոց (օրաթերթ, շաբաթաթերթ) ենթա-անուանակարգի գլխաւոր մրցանակը շնորհուեցաւ «Ազդակ» օրաթերթին (Լիբանան, Պէյրութ): Այս ենթա-անուանակարգի մրցանակակիրներ դարձան «Ժամանակ» օրաթերթը (Թուրքիա, Ստամբուլ), «Հորիզոն» շաբաթաթերթը (Քանատա, Մոնրէալ), «Ազատ օր» օրաթերթը (Յունաստան, Աթէնք) եւ «Ալիք» օրաթերթը (Իրան, Թեհրան):

Տպագիր լրատվամիջոց (ամսագիր, ամսաթերթ, պարբերական, հանդէս) ենթա-անուանակարգի գլխաւոր մրցանակը ստացաւ «Համայնապատկեր» գրական մշակութային հանդէսը (ԱՄՆ, Գլենդել): Մրցանակակիրներ՝ «Անիւ» ամսագիրը (ՌԴ, Մոսկուա), «Օրեր» ամսագիրը (Չեխիա, Փրակա) եւ «Գործարար» ամսագիրը (ՌԴ, Կալուգա):

 

 

Ինտերնետային լրատվամիջոց ենթա-անուանակարգի գլխաւոր մրցանակը շնորհուեցաւ «Անալիտիկա» կայքէջին (Ուքրաինա, Քիեւ): Մրցանակակիրներ՝ «Կիպրահայեր» կայքէջը (Կիպրոս, Նիկոսիա) եւ «Քոլեքթիվ Վան» կայքէջը (Ֆրանսա, Իսի Լէ Մուլինօ):

Ռատիօեթեր ենթա-անուանակարգի գլխաւոր մրցանակը շնորհուեցաւ «Վանայ ձայն» ռատիոյին (Լիբանան, Պէյրութ): Մրցանակակիրներ՝ «Կոմիտաս» ռատիոժամը (Ուրուկուայ, Մոնթէվիտէօ), «Ռատիօ Արմենի»-ն (Ֆրանսա, Լիոն) ¨ «Պոսթոնի հայկական անկախ ձայնասփիւռ» ռադիոժամը (ԱՄՆ, Ուոթըրթաուն):

Հեռուստատեսութիւն ենթա-անուանակարգի գլխաւոր մրցանակը շնորհուեցաւ «ԷյԱրԹիԷն-Շանթ» հեռուստատեսութեան (ԱՄՆ, Գլենդէյլ): Մրցանակակիրներ՝ Վրաստանի հանրային հեռուստատեսութեան «Մոամբէ» լրատուական ծրագրի հայերէն ծրագիրը (Վրաստան, Թբիլիսի), «Կարկաչ» հեռուստատեսութիւնը (ԱՄՆ, Վալենսիա) եւ «Էքսփրէս TV» հեռուստաընկերութիւնը (ԱՄՆ, Գլենդէյլ):

 

 

Կայքէջի պարասխանատու-խմբագիր ընկ. Սիմոն Այնէճեանի ժողովի ընթացքին ելոյթ ունեցած է նաեւ զեկուցումով մը, որ կը ներկայացնենք ստորեւ.
«Հայկական քարոզջութիւնը միջազգային մամուլին մէջ եւ հայկական ԶԼՄ-ի դերը քարոզջական պատերազմին մէջ։ Ընկերային ցանցերու եւ պլոկներու դերակատարութիւնը հակահայկական քարոզջութեան հակադարձելու գործին մէջ»
 

Այս նիւթը, որ պիտի ներկայացնեմ այսօր ձեզի, ինչպէս բոլոր նիւթերը, որոնք պիտի լսուին այս համագումարին, գուցէ մի քանի ժամ տեւող ներկայացումի կը կարօտի, գուցէ եւ աւելի երկար եւ մանրամասն ու մասնագիտացած միտքերու փոխանակումով, որ այս կարճ ժամանակամիջոցին մէջ հնարաւոր չէ իրագործել։

Կը յուսամ որ այս կարճ ներկայացումը առիթ կուտայ համագումարի մասնակիցներուն եւ համացանցի վրայ մեզի հետեւողներուն, որպէսզի մտածեն համացանցի ընդձեռած հսկայական կարելիութիւններուն մասին եւ իրենց լրատուական, քարոզջական...եւ ինչու չէ՝ իրենց ամենօրեայ կեանքի անբաժան մասը կը դարձնեն զայն։

Համացանցի ընդձեռած կարելիութիւնները եւ մարտահրաւէրները չեն տարբերիր որեւէ այլ պատերազմի դաշտէ։

Ինչպէս պարագան է պատերազմի համար, պէտք է ունենալ, պէտք է ստեղծե՛լ կարող զինուորական ղեկավարութիւն, հսկայական զինուորական պիւտճէ, մարտավարութիւն, ռազմավարութիւն եւ քաջ զինուորներ։

Ինթըրնեթի մեր հայ զինուորները, որոնք կը գտնուին պատերազմի դաշտին վրայ, օժտուած չեն կեդրոնական հրամանատարութեամբ, չունին ֆինանսական կարողութիւններ, չկայ համահայկական մարտավարութիւն։

Հակառակ որ յարաբերաբար համացանցի վրայ մեր թշնամիներէն աւելի ներկայ ենք, հակառակ որ տարածուած ենք տարբեր երկիրներու մէջ, հակառակ որ ունինք մասնագիտացած գիտելիքներ, կը տիրապետենք տարբեր լէզուներու, ունինք լուրեր թարգմանելու լայն կարողութիւններ, ունինք թղթակիցներու լայն ցանց մը թէ՛ հայկական եւ թէ՛ օտար միտիաներու եւ ոլորտներու մէջ... մեր ինթըրնեթի զինուորները դժբախտաբար պատերազմի դաշտի վրայ կը գտնուին որսորդական զէնքերով միայն։

Բաւարար չէ որ հայկական կազմակերպութիւնները - եւ բոլոր անոնք, որոնք համացանցի վրայ ներկայութիւն են - համացանցին վրայ www. կայք մը ունենալով ինքնագոհ նստին իրենց ափերուն վրայ։

Բաւարար չէ նոյնիսկ եթէ այդ կայքէջերը բազմալեզու այլընտրանքներ - որոնց կարքին նաեւ թրքերէն - կը պարգեւեն այցելուներուն։

Եթէ կայքէջ ենք, կարեւոր է հաստատել որակական ներկայութիւն եւ որակական այցելուներ - օգտագործելով կեդրոնական ցանց մը, որ պէտք է ստեղծուի - որ կարելիութիւն պիտի տայ լուրեր մոնիթոր ընելու, լուրեր թարգմանելու եւ կ'ընդգծեմ՝ արագ կերպով լուրեր սփռելու։

Բաւարար չէ որ մեր լաւագոյն վերլուծական միտքերը զբաղին փոքր շրջաքայութիւն ունեցող պլոկերու եւ թերթերու մէջ։

Եթէ վերլուծական միտք ենք, խմբագիր կամ յօդուածագիր ենք, ապա պէտք է զբաղինք մեր հակառակորդ ժողովուրդներու լայն զանգուածին մեր տեսակէտները հասցնելու գործով։ Այսօրուայ Թուրքիոյ մէջ տեղի ունեցող իրադարձութիւնները արդիւնք են նաեւ ա՛յն իրողութեան, թէ թրքական կառավարութիւնը կը գիտակցի թէ առաջարկուած փոփոխութիւնները պիտի ընդունուին ժողովուրդի կարեւոր մասին կողմէ։ Իսկ համացանցի մեզի համար ստեղծած կարելիութիւնները, մեզի պէտք են ուղղել, ամբողջական կերպով օգտագործելու հանրային կարծիքը ձեւաւորող բոլոր հնարաւորութիւնները։

Բաւարար չէ միտիա ցանցերը, մեր միտքերը եւ մեր ուժերը օգտագործել մեծամասնութեամբ հայութեան ուղղուած լուրերով եւ խմբագրականներով, եւ կամ լրատուութեան հետ առնջուող յարակից այլ հարցերու հետ։

Եթէ կը հաւատանք թէ Դատ ունինք եւ բաց հաշիւներ ունինք մեր թշնամիներուն ու հակառակորդներուն հետ, ապա պէտք է մենք մեզմով զբաղելու դիւրին ճամբայէն, ձերբազատենք մեր լաւագոյնները, լծելով զիրենք մեր տեսակէտները փոխանցելու գործին մէջ մեզի հակառակորդ ժողովուրդներու զանգուածներունն։

Համացանցի ընդձեռած ներկայի եւ ապագայի կարելիութիւնները ամենա-ազդու միջոցն են այս նպատակը իրագործելու համար։

Բաւարար չէ ուրախանալ թէ տարածուն կայքէջեր բարձր շրջաքայութիւն ունին, երբ անոնց մեծամասնութիւնը կուգայ շրջաններէ եւ երկիրներէ, որոնք անմիջականօրէն չեն առնջուած Հայ Դատի եւ հայութիւնը յուզող հարցերու մասին որոշում կայացնող կեդրոններու եւ անձնաւորութիւններու հետ։

Որեւէ աշխատանք կ'իմաստաւորուի եթէ կարելի է զայն արհեստավարժօրէն չափել եւ որակաւորել։ Եթէ մասնագիտացած արհեստավարժներ չ՛օգտագործենք մեր համացանցի ուրկանները նետելու գործին մէջ, ճիշդ պատկերը չենք կրնար ունենալ թէ մեր տարած աշխատանքը ու՞ր կը հասնի եւ որքա՞ն ազդու է։

Բաւարար չէ ընկերային ցանցերու ընդձեռնող նորելուկ այս միջավայրին մէջ ուրախանալ թէ բարձր թիւով ելեկտրոնային հասցէներու կը հասնինք։

Եթէ մեր նպատակը քայլ պահել է եւ արագ կերպով համարկուիլ հաղորդակցութեան արդի մեթոտներու հետ, պատրաստ պէտք ըլլանք, արագ կերպով ընդգրկելու իննովէյշըններ՝ նորութիւններ, որոնք հետըզհետէ եւ աւելի ու աւելի արագ կերպով կը գրաւեն ինթըրնեթի աշխարհի յարափոփոխ ասպարէզը։ Օրինակ՝ 10 տարուայ վրայ երկարող հսկայական աշխատանք մը, որ Կիպրահայեր ելեկտրոնային կայքէջը տարած է, հաւաքելով տասնեակ հազարաւոր ելեկտրոնային հասցէներ, շուտով կրնան ժամանակավրէպ դառնալ, զոհ երթալով զարգացող հաղորդակցութեան նոր միջոցներու, ինչպիսին են facebookը, twitterը, msnը եւ oovooն, տալու համար քանի մը օրինակ միայն։

Բաւարար չէ յուսալ թէ մեր խօսքը կը հասնի մեր թշնամիներու բնակչութեան լայն խաւերուն։

Եթէ թիրախ դրած ենք մեր կարելիութեան սահմաններէն ներս արդէն իսկ գոյութիւն ունեցող զէնքերը լաւագոյնս օգտագործել, իսկապէս փոփոխութիւն բերելու համար, այն ատեն պէտք է վերատեսութեան ենթարկենք մեր առաջնահերթութիւնները, կեանքի կոչելով նոր մարտավարութիւն, օգտագործենք այդ ինթըրնեթի փաղանքին կարելիութիւնները, որոնք արդէն իսկ ներկայ են ինթըրնէթի պատերազմի դաշտին վրայ, եւ որոնք ճիշդ ուղղութեամբ եւ կիրառութեամբ, կրնան վերածուիլ հաշուի առնուող զէնքի մը, որ տարբերութիւն պիտի ընէ մեր դրած թիրախներուն կապակցութեամբ։

Այժմ, այս բանակը, որ կը գտնուի ինթըրնէթի վրայ, չի բաղկանար միայն միտիա կեդրոններու, թղթակիցներու, յօդուածագիրներու, խմբագիրներու, կուսակցական օրկաններու եւ կառավարական խօսնակներու կողմէ։ Ինթըրնեթի ընդձեռած հնարաւորութիւնները եւ կարելիութիւնները, աւելի ու աւելի ձայն տուած են մեծ թիւով անհատներու, որոնք գուցէ նաեւ տարբեր պայմաններու տակ, առիթն ու ձայնը պիտի չունենային տեսակէտ յայտնելու եւ հանրային կարծիք կազմաւորելու։

Այսօր, պատահական չէ, որ մինչեւ օրս, տարածուն կարծուած միտիա կեդրոններէն անդին, կը ծլին youtubeի, live streamingի եւ blogերու բարձր շրջաքայութիւն ունեցող ներկայութիւնները, որոնք մեր թիրախներու իրագործման ճամբուն վրայ կրնան դառնալ քարոզչական ազդու զէնքեր։

Սակայն, լաւագոյնս օգտագործելու համար այս բոլորը, այս էջերը հետեւողական մօնիթորինկ կ'ուզեն, որովհետեւ ինթերնեթի ազատ բեմին վրայ մեր ստեղծած ցանցերը նոյն ատեն կրնան օգտագործուիլ մեր դէմ, մեր թշնամիներու քարոզջական աշխատանքին համար։

Պէտք է գիտակցիլ որ, թէ՛ մեր թշնամիներուն եւ թէ՛ մեզի համար, դժուար է պահել ամբողջական համոզումներ եւ բացարձակ տեսակէտներ։

Լուրերու ազատ շրջաքայութեան, միտքերու ազատ զարգացման եւ տեսակէտներու ուժեղ բախումի արդիւնքը կ'առաջնորդէ նոր տեսակէտներու կազմաւորումին։ Մենք պէտք է ձգտինք նոր տեսակէտներու ձեւաւորման, եւ գիտակցինք, թէ տակաւին շատ ճամբայ ունինք կտրելիք, ոչ միայն տեսակէտներ զարգացնելու համար, այլ պարզ պատմական իրողութիւններ մեր շրջապատին սեփականութիւնը դարձնելու համար։

Երբ Հրանդ Տինքին կը հարցնէին թէ ի՞նչ է թուրք ժողովուրդի տեսակէտը հայկական ցեղասպանութեան կապակցութեամբ, ան կը պատասխանէր ըսելով, «Ո՞ր տեսակէտը»։ Թուրք ժողովուրդին պէտք է տեղեկութիւններ փոխանցել ցեղասպանութեան իրողութեան եւ փաստին մասին։

Խիստ կարեւոր կը նկատենք նաեւ գործակցութիւնը մեր բարեկամ եւ զինակից ժողովուրդներու եւ պետութիւններու լրատուական միջոցներուն հետ։ Օրինակ՝ քրտական, կիպրական, յունական եւ ասորի լրատուամիջոցներու հետ գործակցութիւնը լուրջ վերատեսութեան պէտք է ենթարկուի, իսկ շատերու պարագային՝ պէտք է ծնունդ առնէ։

Այս յարաբերութիւնը պէտք է ըլլայ փոխադարձ, երկու կողմերուն ապահովելով լայն հնարաւորութիւններ, թափանցելու այս միջոցներուն ազդեցութեան տակ գտնուող լայն զանգուածներուն։

Մեր թշնամիները արդէ՛ն իսկ կազմած են այս լրատուական դաշինքները եւ լաւագոյնս կ'օգտագործեն զանոնք, լրատուական պատերազմի դաշտին վրայ։ Այս դաշինքները զինուած են նաեւ միլիոնաւոր տոլարներ արժող պիւտճէներով։

Մեր առաջին զինակիցը մեր քաղաքական դատի ճշմարտութիւնն է։ Տարբերը փաստելու հարկադրանքին տակ չենք գտնուիր, կէս ճշմարտութիւններ եւ սուտեր հրամցնելով մեր շրջապատին։ Սակայն, ճշմարտութիւնը բաւարար չէ, իրաւունք ունենալը բաւարար չէ։ Կարեւորը յաղթական դուրս գալն է քարոզջական պատերազմի դաշտէն, ուր շատ անգամ, տուած ենք եւ կուտանք զոհեր։

Լրութեան պատը փշռելու ճամբուն վրայ շատ սուղ գին վճարեցինք ո՛չ հեռու անցեալին, այդ ճանապարհին վրայ տալով մեր լաւագոյն տղերքը։ Այսօր, ներկայ հաղորդակցութեան դարուն մէջ, ինթըրնեթի քարոզչական արշաւը, նոյնքան, գուցէ եւ աւելի ազդու արդիւնքներ կրնայ բերել մեզի համար, եթէ այս դաշտին վրայ մինակ չթողենք մեր զինուորները։

Մեր ազգային դատերը պաշտպանելու եւ մեր թշնամիներու քարոզչութեան հակազդելու համար, այս աշխատանքը պէտք ունի ոչ միայն անոնց, որոնք իրենք զիրենք կը կոչեն թղթակից կամ միտիայի մարդ, այլ բոլոր անոնց, որոնք պատրաստ են իրենց ինթերնեթի ներկայութիւնը որակաւոր զէնքի վերածելու եւ մասնակցելու այս քարոզչական արշաւին։

Ֆորումներու, պլոկերու, youtubeի...ընդհանրապէս ընկերային ցանցերու, այսինքն` social network-ներու ստեղծած քաղաքական արդիւնքները մեր առջեւ կը գտնուին ամէն օր եւ ամենուրէք։ Այս երեւոյթի վերջին օրինակը կ'ուզեմ տալ ձեր բոլորին, մեր Կիպրոսէն, ուր social media-ներու եւ ընդհանրապէս համացանցի վրայ թիրախաւոր քարոզչական արշաւէ մը ետք, հսկայական քաղաքական նշանակութիւն ունեցող համբաւաւոր երաժիշտներու համերգներ, որոնք ֆինանսաւորուած էին թրքական քարոզչական պիւտճէներու միլիոններով եւ կազմակերպուած` այսպէս-կոչուած Հիւսիսային Կիպրոսի Թրքական Հանրապետութեան կողմէ, ջնջուեցան։ Երգիչներ, ինչպէս Ռիանա, Ճենիֆըր Լօփէզ եւ Խուլիօ Իկլէսիաս, թրքական հրաւէր ընդունելէ եւ համապատասխան համաձայնութիւններ կնքելէ ետք, ընկերային միտիաներու ազդեցութեան տակ, եւ բարձրացող բողոքի ալիքին դիմաց, հարկադրաբար ջնջեցին ծրագրուած համերգներ, քաղաքական յաղթանակ ապահովելով, իրական եւ շօշափելի արդիւնքներով։

Նոյն նժարին վրայ, վաղուայ Արցախի քաղաքական եւ օրինական ճանաչման ճամբուն վրայ կարեւոր դեր պիտի ունենան ոչ միայն ձեռք բերուած քաղաքական յաջողութիւնները, այլ գուցէ եւ աւելի, անոնց արձագանգումը համաշխարհային միտիային մէջ, ազդու կերպով արտացոլելով այն իրականութիւնը որ մենք կ'ուզենք ցոյց տալ համայն աշխարհին։

Կրկին օրինակ մը մեր փոքր Կիպրոսէն։ Առաջին անգամ ըլլալով, մրցոյթ յայտարարուեցաւ Կիպրոսի Զբօսաշրջութեան Կազմակերպութեան կողմէ, ուր կառավարութիւնը յատկացուցած էր 1 միլիոն եւրօ պիւտճէ մը, համացանցի եւ ընկերային ցանցերու մէջ ծանուցում ապահովելու համար, Կիպրոսը ծանօթացնելու իբր զբօսաշրջութեան վայր։

Այլ օրինակ մը. 12 տարիներ առաջ, Կիպրոսի ՀՅԴ Հայ Դատի Յանձնախումբը ձայնասկաւառակ մը հրատարակած էր, համբաւաւոր յոյն կիպրացի երգիչ՝ Միխալիս Հաճիյաննիսի հետ։ Ձայնասկաւառակը մինչեւ 1999 ծախուած էր 3,000 օրինակով, իսկ այժմ, այս երգերը, որոնք պատահական մարդկանց կողմէ youtubeի վրայ upload եղած են, սեփականութիւնը դարձած են հարիւր հազարաւոր այցելուներու։

Մեր հարեւան Պէյրութի մէջ վերջերս պատրաստուած շատերու համար անհամ, ուրիշներու համար անկիրթ, տուներու մէջ պատրաստուած, բայց բոլորին համար ծիծաղ յառաջացնող, youtubeի երիզներ կրցած են ապահովել կէս միլիոն այցելուներ։ Թիւ մը, որուն մէկ հարիւրերորդին այցելութիւնը ապահովելու համար, շատ մը լուրջ, քաղաքական թերթեր կամ կայքէջներ, ամէն ինչ պիտի տային... Եւ գուցէ երբեք ...այդ այցելուներու թիւին մէկ հարիւրերորդին չ'արժանանային։

Վստահաբար, երգեր եւ անեկդոտներ կապ չունին քարոզջական մեր աշխատանքին հետ, սակայն այս բոլորը դիտելով, պէտք է հարկ եղած դասերը քաղել, թէ համացանցի պատերազմը կրնայ եւ պիտի շահուի, կազմակերպուած, ազդու, բլանաւորուած եւ սիստեմաթիք աշխատանքով, սակայն ան անկասկած պիտի շահուի նաեւ, թիւերու գերակայութեամբ։

Այս դաշտը լուրջ փոփոխութեան ենթարկուած է վերջին 2 տասնամեակներուն, ուր այլեւս տեղ չունին անցեալի պատրուակները, տեղ չունին պիւտճէական սահմանումները, տեղ չունին քաղաքական հաշիւները, որոնք անցեալին պատճառ կրնային դառնալ, որ մեր յօդուածները, նամակները, տեսերիզները, եւ ընդհանրապէս, մեր քաղաքական խօսքը չհասնին լայն հասարակութեան։

Այսօր, ամէն անձ համացանցի վրայ զինուոր մըն է եւ ամէն անձ ունի ուժն ու կարողութիւնը այս ասպարէզը օգտագործելով, մասնակցելու քարոզչական արշաւին, որուն նպատակն է տեսակէտ կազմաւորել, փոխուած տեսակէտները նոր արարքներու վերածել, որմէ պիտի օգտուին մեր ազգային գերագոյն շահերը։

Վստահաբար այս բոլորի բլանաորումը, մի քանի օրուայ վրայ երկարող նման ժողովի մը մէջ չէ որ պիտի քննուին, սակայն եւ այնպէս, համոզուած եմ որ մեր Նախարարութեան որոշումը նոյնիսկ այս նիւթը ներառնելու մեր ժողովի օրակարգին վրայ, պատահական նիւթի մը ընտրութիւնը չէ, այլ կ'ուզեմ հաւատալ որ սկիզբն է այս աշխատանքի առաջին քայլին, որուն առաջին քննարկումին ձեզ կը հրաւիրեմ իսկոյն...

Շնորհակալութիւն

 
© 2017 Gibrahayer e-Magazine
Armenia street 32, Floor 4 & 5, No. 401
P.O.Box 24609 Nicosia 1301 - Cyprus
Telephone:(+357) 22516688 Mobile: (+357) 99437073
Email: info@gibrahayer.com
Pleased to see our 1520628-th visitor
Made in TIL-Design Studio
Website information